����Vlog

Bydd y buddsoddiad yn talu am osod to newydd ar yr adeilad, uwchraddio systemau mecanyddol a thrydanol a gosod system fodern i reoli’r adeilad er mwyn lleihau'r defnydd o ynni a lleihau allyriadau carbon.  

Mae'r gwaith hwn yn rhan o gyfres o fuddsoddiadau i gyflwyno isadeiledd adnewyddadwy a mesurau datgarboneiddio gwres ac effeithlonrwydd ynni yng ngholegau a phrifysgolion Cymru.  

Dywedodd Lars Wiegand, y Cyfarwyddwr Isadeiledd, “Rydyn ni ar ben ein digon bod ein cais am gyllid wedi cael ei gymeradwyo. Mae Adeilad Brambell yn adeilad eiconig ac mae'r mesurau uwchraddio hyn yn hanfodol ac yn cyd-fynd â'n hymrwymiad hirdymor i gynaliadwyedd.”  

Cafodd Adeilad Brambell ei gwblhau yn 1971 ac mae’r adeilad rhestredig Gradd II yn enghraifft nodedig o bensaernïaeth friwtalaidd. Cafodd ei ddylunio gan gwmni o benseiri o Gymru, Syr Percy Thomas a'i Fab. Mae'r adeilad wedi'i enwi ar ôl Francis W. R. Brambell, Pennaeth Swoleg Prifysgol Bangor o 1930 hyd at ei farwolaeth yn y 1960au. Roedd ei ymchwil arloesol yn edrych ar sut mae imiwnedd yn cael ei drosglwyddo o famau i'w hepil yn ystod datblygiad embryonig.